Ontstaon

D'r zien waal ens van die dinger wao beej se dinks; Waat kin 't döbbeltje raar rolle. Zoë auk 't ontstaon van De 3-kes. 't Laeve hingk van toeval aan ein en 't toeval haet heej auk zien stein-ke of eigelik 'nne ganse grindtegel aan beejgedrage.

Op 'nne verjeurdaag in december 2001 is de basis gelag van Groët Venloosch Vastelaoves Gezelschap de 3-kes. 't Oétroope van 'nne alternatieve prins van Bliérick zörgde d'r veur det 't spraekwaordelikke belke ging rolle. Zoë as geej weit begint nao ald op niej de vastelaovend en 't ideej waort dan auk geopperd um met Prins Maurice I nao de prinse recepsie van de Wortelepin te gaon. Onder 't genot van ein pilske waort beej Urbaan Verberkt ein vastelaovesgezelschap geformeerd; dich wuurs en dich wuurs... Maar wie heite weej dan? "De 3-kes" reep d'r eine, weej hadde toen namelik maar 3 raodsleeje. Op die meniér waas 't gezelschap gebaore, niks mier en niks minder. Vervólges woort d'r op de Diepedijkstraot 3 tomatesoep gegaete. Heejmei waas auk metein 't De 3-kes gerech 'n feit. De iérste echte vergadering vond ein waek later plaats. Heej waort beslaote neet nao de resepsie toe te gaon, maar um ein organisatie op te gaon zette. Auk woort 'n concep bedach veur de Vastelaovesvereiniging: Alles mit de 3, veur groët Venlo (doelgroep 20 tot en met 35 jaor) en 'n Nar as boegbeeld.

D'r is vuul gepraot en geregeld gewaore veur we op 03-03-03 offisjeel De 3-kes prissenteerde in de Venloosche optoch. De waeke veuraafgaonde aan 03-03-03 (de statutaire oprichtingsdatum van de vereiniging) vond ‘De 3-kes kômme d'r aan!’ stickeraksie plaats en op 27 fibberwarie stond d'r ‘n pagina groët artikel in Daagblaad de Limburger. Nao vastelaovesmaondaag is d'r nog vuul werk verzatte. Dit haet onder andere geresulteerd in zeve suksesvolle De 3-kes Narreballe. Veur de derde editie woort zelfs ’t failliete Citytheater door De 3-kes veur eine aovend heräöpend. D’r is ‘nne gooje organisasiestructuur ontwikkeld en De 3-kes telt momenteel zo’n 15 aktieve leeje. De kontakte mit Vastelaovesgezelschappe in Groët Venlo zien erg good te neume en d’r zien dan auk regelmaotig ontmoetinge mit gezelschappe. Doornaeve is De 3-kes geleef beej de inwoëners van de gemeinte Venlo en ’t initiatief wuurt ondersteund door d’n börgemeister (Inmiddels is De 3-kes al twië kier op 't stadhoés ontvange en is d'n hiër Bruls al twië kier mei gewaes mit de Stadsdeiletoer op Vastelaovesmaondaag). De 3-kes steit d’r bekind um de zake ludiek en good te organisere. In 2006 proklameerde De 3-kes as iërste vereiniging in Groët Venlo ’n maedje as kertrekker van de Vastelaovend. Dit gegaeve deej stof opweije in de lokale media en woort as geweldig ervare door Vastelaovendvierend Groët Venlo.

’n Jaor later leet De 3-kes weer op ’n ludieke menier van zich huure. De Groët Venloosche Nar woort namelik oétgeroope op ’t bordes van ’t Stadhoés. Via ’n cameraverbinding kôste de bezeukers van De 3-kes Narrebal IV dit laif volge op ’n groët scherm. Ald-wethalder van cultuur Jo van der Velden had de iér um de Nar van 2007 oét te roope. De 3-kes is de iërste vereniging die ’t bordes gebroek haet veur de bekindmaking van ziene kertrekker. In 2008 woort ’n Nar gekaoze aafkomstig oét Steyl. Dit zörgde d’r veur det ’t Schoënste plaetske efkes op de kop stond. Det jaor woort de Groét Venloosche Nar rond gereeje in 'nne witte Amerikaanse limousine. Heej woort vuul bekieks meigetrokke. 't Vastelaovesseizoen 2008-2009 stond in 't teike van t 2x3 jeurig jubileum. De Nar van det jaor kwaam oét Bliërick en prissenteerde zich onder 't motto "Dét... is Vastelaovend". D'r woort 'n spesjaal leedje geschreeve euver dit motto. Ben Verdellen, Thei & Marij en Bram & Ruud zonge 't leedje in. 't Woort 'n groëte hit in Groët Venlo. 't Leedje is nog steeds via deese site te downloade. 't Seizoen 2009-2010 brach De 3-kes 'n gans niej initiatief. 't Gezelschap prissenteerde op 11-11 zien eige radiostation "De 3-kes radio.nl". Auk heej meug waere gespraoke van 'n groët sukses. Haos 20.000 minse luusterde non-stop nao Vastelaovesleedjes oét Groët Venlo. De Nar woort gezoch en gevonde in Belvend. Deese persoën wis mit zien danse de minse op zien hand te kriege. 't Waas auk de 1ste Nar die voot aan de grond haet gezatte in Arce, Lomm en Velde. Dees plaatse huure sinds 1 jannewarie beej Groët Venlo. De 3-kes haet meigetrokke in de Gekkemaondaagsoptoch van Velde en is op bezeuk gewaes beej de Keieschieters in Arce.

Vaerder haet De 3-kes de aafgelaupe twië jaor 'nne driévende Borrel georganiseerd. Via mooder Maas woorte alle stadsdeile bezoch. Vrinde, bekinde, kinnisse en gezelschappe kóste op de Maashopper 'n pilske drinke mit de Nar. Deese Borrel zal, net wie de 3-kes radio, in 't nieje seizoen truuk kiere op de agenda. Laot de Vastelaovend van 2011 maar kômme. De 3-kes Narrebal vind zaoterdaag 29 jannewarie plaats.

Veur oétgebreidere informasie kint geej kontak opneme met 't sikkertariaat.