In 2005 is de wisseltrofee 't 3-ke veur 't iérs oétgereik. Deese priés wuurt sinds daen tiéd jaorliks toegekind aan 't ludiekste, orgineelste en kreatiefse 3-tal van de Groëte Bliërickse optoch. Initiatiefnemer van de priés is De 3-kes. Heejdoor hebbe al zeve 3-talle zich winnaer meuge neume van 't 3-ke. In 2012 wuurt de priés dus veur de achste kier oétgereik. De 3-kes haet beslaote, in onderling euverleg mit de Wortelepin, um de opzet iets te verandere. Waat blief is det de 3-talle zich môtte inschriéve tiédes de reguliere inschriéfaovende van de Wortelepin. Auk blief 't drei-je um 't ludieke, aktuele en kreatieve ideej van de 3-spanne. Heej zal de sjurie oétintelik auk weer op beoordeile. De wiéziginge die waere doorgevoerd zien zichbaar op Vastelaoveszondaag. Zoë zal de Groët Venloosche Nar 2012 alle 3-talle beej 't opstelle sukses gaon winse. Hae zal 'n präötje gaon make mit de deilnemers en gaon kieke wie alle 3-spanne zich gaon prissentere. Beej dees ontmoeting krieg idder 3-tal 'nne tros ballonne. Zeej kriege allemaol 'n andere kleur zoé det zeej zich auk good kinne onderscheide van mekaar. Vervôlges gaon zeej meidoon aan d'n Groëte optoch. 't Moment wao de vaksjurie in aksie kump. De sjurering is aevel nimmer allein in hand van dees minse. Via twitter is 't meugelik um as toeschouwer van de Groëte Bliërickse optoch mei te stumme. Det kin hiel mekkelik door diene favoriet te twittere nao #de3kes. In dien berich zetse vervolges 't optochnummer en de kleur ballonne van diene winnaer (dus beejveurbeeld #de3kes nr.33 blauw). De 3-kes zal dees 'stumme' meineme in de indbeoordeiling en zoë kômme tot 3 winnaers. Det is namelik de volgende wiéziging. Andere jaore woort allein 't 3-tal mit de meiste punte beloénd. Vanaaf 2012 waere d'r 3 wisseltrofeeën oétgereik. Plaats 3, 2 en 1 kriege 'n beeld mei nao hoés. Spesjaal heejveur zien in samewerking mit 't bedriéf 'Schouren metaal' nieje beeldjes ontworpe. 't Meuge dudelik zien det dees kwa gruuéte verschille. De volgende verandering is det de winnaers neet mier bekind gemak waere tiédes 'Bliërick Blief Boéte'. Dit zal gaon gebeure nao d'n optoch op 't punt van ontbinding. De 3-talle zulle dan nog 'nne kier in defilé veurbeej trekke aan de Groët Venloosche Nar 2012. Neet vuul later waere vanaaf de Narrewage de winnaers bekind gemak. Zoë blieve de deilnemers neet langer onnuuédig in spanning. En d'r kin metein 'n feesje waere gebouwd door de 3-talle en De 3-kes op de plaats wao d'n Groëte optoch zich ontbind. We roope idderein op um mei te doon. Schriéf dich dus in veur de Bliërickse optoch tiédes de offisjele inschriefaovende van de Wortelepin. Kom dinsdaagaovend 24 of 31 jannewarie of 7 fibberwarie nao kefee Apollo, van 20.00 wies 22.00 oor. Doot mei en maak kans op ein van de 3 nieje beeldjes. Gewoén umdet 't kin!
